ഒമ്പതാം ക്ലാസ്സിൾ പഠിക്കുമ്പോൾ ക്രഷ്, വയറുവേദനയെന്ന് പറഞ്ഞ് സ്കൂളിൽ പോയില്ല, ശശി എന്നായിരുന്നു പേര്; ശ്രീജ രവി

ഡബ്ബിം​ഗ് രം​ഗത്ത് വർഷങ്ങളുടെ അനുഭവ സമ്പത്തുള്ള ശ്രീജ രവി ഇന്ന് അഭിനയ രം​ഗത്തും സാന്നിധ്യമറിയിക്കുന്നുണ്ട്. കാവ്യ മാധവൻ, നയൻതാര, റോമ, ശാലിനി തുടങ്ങി നിരവധി താരങ്ങൾക്ക് ശ്രീജ രവി ഡബ് ചെയ്തിട്ടുണ്ട്. ഇപ്പോഴിതാ ശ്രീജയുടെ പഴയ അഭിമുഖം വീണ്ടും സോഷ്യൽ മീഡിയയിൽ ശ്രദ്ധ നേടുകയാണ്. 9 ാം ക്ലാസ്സിൽ പഠിക്കുമ്പോൾ തനിക്ക് ഒരു ക്രഷ് ഉണ്ടായിരുന്നെന്നാണ് ശ്രീജ പറയുന്നത്. റോയൽ വാക്കർ എന്ന് അദ്ദേഹത്തിന് പേര് നൽകിയിരുന്നുവെന്നും, ആരാണെന്നോ പേരെന്താണെന്നോ ഒന്നും അറിയില്ലായിരുന്നുവെന്നും ശ്രീജ പറഞ്ഞു. ഒടുവിൽ അദ്ദേഹത്തിന്റെ പേര് കണ്ടെത്തിയെന്നും ശ്രീജ പറയുന്നു.

‘അമ്മയുള്ള സമയത്ത് ഒരു ക്രഷ് ഉണ്ടായിരുന്നു. ഒരു ദിവസം വയർവേദനയാണെന്ന് പറഞ്ഞ് ഞാൻ സ്കൂളിൽ പോയില്ല. ഒമ്പതാം ക്ലാസ്സിലാണ് പഠിക്കുന്നത്. ഞങ്ങളുടെ ബെഡ്റൂമിൽ നിന്ന് സ്കൂളിന്റെ ഗ്രൗണ്ട് കാണാമായിരുന്നു. അവിടെ ഒരു പയ്യൻ ഉണ്ടായിരുന്നു. ബാക്കി എല്ലാവരും യൂണിഫോം ഇടുമ്പോൾ അവൻ മാത്രം കളർ ഡ്രെസ്സിൽ സ്റ്റൈലിൽ വരും. കുറച്ച് താടിയൊക്കെ ഉള്ള പയ്യൻ, വോളിബോൾ കളിക്കുന്നതും നടത്തവും എല്ലാം ഭയങ്കര സ്റ്റൈൽ ആയിരുന്നു.

അവന്റെ നടപ്പിനോട് അത്രയും ഇഷ്ടം തോന്നിയതുകൊണ്ട് മനസിൽ ‘റോയൽ വാക്കർ’ എന്ന പേരും നൽകി. ‘ആരാണെന്നോ പേരെന്താണെന്നോ ഒന്നും അറിയില്ലായിരുന്നു. പക്ഷേ സ്കൂൾ വിട്ട് പോകുമ്പോൾ അവൻ ആ വഴിയിലൂടെയാണ് പോകുക. അതുകൊണ്ട് ഞാൻ ഗേറ്റിന് സമീപം പോയി നിൽക്കും. ഒരിക്കൽ എന്റെ ഏട്ടൻ അത് കണ്ട് ‘എന്താണ് ഇവിടെ നിൽക്കുന്നത്, അകത്ത് പോ’ എന്ന് പറഞ്ഞ് ഓടിച്ചു. പിന്നീട് ഒരു സ്കൂൾ ഫംഗ്ഷനിൽ പങ്കെടുത്ത് മടങ്ങുമ്പോഴും ആ പയ്യനെ ഒന്ന് കാണാമെന്ന ആഗ്രഹം കൊണ്ട് ഓട്ടോ പോലും പിടിക്കാതെ നടന്ന് വന്നു.

അവനെ ഒന്ന് കണ്ടുകൊണ്ട് വരാമെന്ന് കരുതി നടക്കുകയായിരുന്നു. പക്ഷേ ഏട്ടൻ എന്നെ ഫോളോ ചെയ്ത് വന്നു. എന്തോ ഗുലുമാൽ ഉണ്ടെന്ന് അവന് മനസിലായി. ഒടിവിൽ ഫ്രണ്ട്സിൽ നിന്നും ആ ‘റോയൽ വാക്കർ’ന്റെ പേര് മനസിലാക്കി, ശശി എന്നായിരുന്നു അവന്റെ യഥാർത്ഥ പേര്,' ശ്രീജ പറഞ്ഞു.

Content Highlights: Sreeja Ravi opened up about a personal memory from her school days, revealing that she had a crush when she was in ninth grade, in a recent interview.